Ես երևի այն չլինեի, ինչ կամ, եթե քեզ հանդիպած չլինեի: Քեզ հետ ես սովորեցի հավատալ ինքս ինձ, դիմացինին, մարդկանց, Աստծուն, բնությանը: Դու ինձ հավատ տվեցիր: Գիտե՞ս, երբ մեր առաջին ժամադրությանը դու ինձ պատարագի տարար, ես հավատ գնեցի` վաճառելով հիշողություններս: 

Ես երևի չապրեի այնպես, ինչպես ապրում եմ, եթե չընդունեի քեզ` որպես նվեր ճակատագրից: Քո կողքին ես ազատ եմ շնչում, քո կողքին ես չեմ վախենում: Դու ինձ սեր տվեցիր, այնպիսի սեր, որ կործանելու, ջարդելու ու փշրելու փոխարեն ապրեցնում է, ոտքի կանգնեցնում ու առաջ մղում:

Ես երևի չմտածեի, որ կյանքն իսկապես նվեր է, եթե դու չբարևեիր ինձ: Քեզ համար ապրելով ես ցանկանում եմ ապրեցնել ամենը, ինչ իմաստ չի տեսնում ապրելու: Դու ինձ մի աշխարհ տվեցիր, որտեղ մենք իրավունք ունենք ու պարտավոր ենք երջանիկ լինել: Երջանկությունը սիրո մեջ է:

Ես երևի մոռանայի, թե ով կա սրտիցս այն կողմ, եթե դու չբռնեիր ձեռքս: Քո մեջ ինձ տեսնելով` ես տեսա Աստծուն. նա ամենքիս մեջ է: Դու ինձ սովորեցրիր, որ հարաբերությունները ավտոմեքենայի նման են. առաջ գնալու համար մարտկոց է պետք. ես ուզում եմ հավատալ, որ կա հավերժական շարժիչ. դա սերն է:

Ես երևի ես չէի լինի, ես երևի արև չլինեի…

Եթե դու չլինեիր, ի՞նչ կանեի ես, ինչպե՞ս կբացատրեի ինքս ինձ, որ ապրել նշանակում է սիրել, որ շնչել նշանակում է սպասել, որ հավատալ նշանակում է համբերել:

Եթե դու չլինեիր, որտե՞ղ էի պահելու երազներս, ու՞մ էի պատմելու հիմար մտքերս, ե՞րբ էի հասկանալու, որ մտքերս միշտ չէ, որ հիմար են:

Եթե դու չլինեիր, ինչու՞ պիտի արթնանայի ու քնեի, երբ արևներն ու լուսինները տանջվում են միմյանց ձգտող երկինքներում, իսկ ես` աննկատ, չնչին, պիտի հուսայի, թե օրն ու գիշերը ինձ համար են ծնվում:

Եթե դու չլինեիր, իմ արևներն ու լուսինները այդպես էլ չէին հասկանա, որ արթնանում են երկուսիս համար:

Եթե դու չլինեիր, ես այդպես էլ չէի սիրի, այո, չէի սիրի այնպես, ինչպես սիրում են իրական կյանքում:

Եթե դու չլինեիր, ես չէի հասկանա, թե ինչ անել այսքան սերը, որ եռում էր երակներումս, բայց բացակա ափերից ցնդում էր ու ներսից այրում անզգացմունք մաշկս:

Եթե դու չլինեիր, ես այդպես էլ կքնեի բարձս գրկած ու չէի իմանա, թե ինչ բան է քնել և արթնանալ տղամարդուդ գրկում:

Եթե դու չլինեիր, մարմինս այդպես էլ կմնար մշտապես մրսող ու դողացող, մաշկս չէր ճանաչի ամեն դիպումից փշաքաղումը, աչքերս չէին իմանա համբույրի ծանրությունից փակումը:

Եթե դու չլինեիր, ես այդպես էլ չէի իմանա, թե ինչու են ստեղծվում այդքան զգեստներ ու դիմահարդարման պարագաներ. դրանք ստեղծվում են քո կողքին միշտ գեղեցիկ մնալու համար:

Եթե դու չլինեիր, ես այդպես էլ չէի հասկանա, որ գեղեցիկ լինելու համար պարտադիր չի դիմահարդարված լինել:

Եթե դու չլինեիր, ես այդպես էլ չէի կրի քո վերնաշապիկներն ու չէի արբի բույրից քո մարմնի:

Եթե դու չլինեիր, ես այդպես էլ առավոտյան չէի քրքրի համացանցը` քեզ համար համեղ նախաճաշ պատրաստելու համար:

Եթե դու չլինեիր, ես այդպես էլ չէի իմանա, թե որքան եմ սիրում նրբերշիկով ձվածեղ:

Եթե դու չլինեիր, ես այդպես էլ չէի երդվի` հնազանդ եմ:

Եթե դու չլինեիր, ես չէի բարձրաձայնի գաղտնիքներս, որ քերում էին հոգիս:

Եթե դու չլինեիր, ես չէի իմանա, որ միլլիոն տարին քիչ է, քիչ, քո կողքին լինելու համար:

Եթե դու չլինեիր, ես չէի պլանավորի պատերազմի գնալ տիեզերքի դեմ` պահանջելու մեզ մի առանձին մոլորակ տալ:

Եթե դու չլինեիր, ես չէի հասկանա, որ սիրում եմ քեզ ամեն գիտական սահմանումներից դուրս:

Եթե դու չլինեիր… Դու պարզապես իրավունք չունեիր չլինել...