A: B: SMS
A: Երբևէ մտածե՞լ
ես, որ մենք տիեզերքի ամենամեծ մասնիկներն ենք, և մնացյալ բոլորը մեզնից այնքան փոքր
են, որ մենք նրանց պարզապես չենք նկատում:
B: Իսկ մոլորակնե՞րը: Դրանք մեծ են:
A: Այդ մասին չեմ մտածել: Երբ նայում եմ աչքերիդ, մոլորակներն
անգամ անհետանում են ու փոքրանում:
B: Ուրեմն իմ աչքերն ամենամեծ մասնիկներն են տիեզերքում:
A: Ուրեմն քո աչքերը տիեզերք են:
A: Կբացե՞ս դուռը:
B: Վերնաշապիկս չեմ գտնում:
A: Ավելի լավ:
A: Ինչու՞ չթողեցիր գիշերեմ քեզ մոտ:
B: Առավոտյան աշխատանքի ես:
A: Իսկ դու ՝ դասի:
B: Մտածում եմ՝ հարբած մարդիկ ամենաանկեղծն ե՞ն, թե՞ ամենաերջանիկը:
A: Իսկ ի՞նչն է ստիպել հարբել:
B: Սովորությունը:
A: Ամենահիմարն են:
B: Երևի:
A: Ես հարբել եմ քեզնով:
A: Լավ եղանակ է: Ի՞նչ ես անում:
B: Պարապում եմ ու փորձում ինքս ինձ համոզել, որ սոված չեմ:
A: Գնում ենք անտառ:
B: Ինչու՞:
A: Գիշերն այնտեղ քնենք:
A: Սիրում եմ:
B: Սիրում եմ:
A: Կբացե՞ս դուռը:
B: Բաց է:
B: Մի ցուցակ եմ ուզում կազմել. 100 բան, որ պետք է անեմ կյանքում:
A: Ես կա՞մ:
B: Ամուսնանալ, երեխաներ ունենալ, մահանալ նույն օ՞րը: Չէ:
A: Իսկ սիրե՞լ:
B: Կա:
A: Ցուցակի մեջ ավելացրու՝ նորմալ պատրաստել սովորել:
B: Ինչ անկեղծ ես:
A: Եվ սոված: Հետ գամ, գնանք սուշի ուտելու:
B: Չէ, պիցցա:
A: Խոհանոցը պատրաստիր. միասին մի բան կմոգոնենք:
B: Ի՞նչ գիրք կարդամ:
A: Անկողնուդ կողքը թողել եմ:
B: Մոռացել էի, որ բազմոցից բացի անկողնում էլ կարելի է քնել:
A: Այսօր այդ օրն է:
A: Սիրում եմ:
B: Սիրում եմ:
B: Թիթեռնիկները մի օր են չէ՞ ապրում:
A: Հա:
B: Ուզում եմ թիթեռնիկ լինել:
A: Ի՞նչ կանեիր:
B: Կարբեի ծաղիկների բույրից:
A: Գնանք կինո:
B: Գնանք ու համբուրվենք:
A: Ձեռքս սահեցնեմ այնտեղ, որտեղ չի կարելի:
B: Գնում ես մենակ:
A: Լավ ֆիլմ էր:
B: Արի ինձ մոտ:
A: Կբացե՞ս դուռը:
B: Բաց է:
B: Վախենում էի: Որ կտեսնես ու կհամեմատես ու կհասկանաս, որ բոլորի
կրծքերը չեն հավասար, բոլորի որովայնը չէ ձիգ, բոլորը չեն հիշում սափրել ոտքերը:
A: Տիեզերք ես:
B: Ուզում եմ թիթեռնիկ լինել:
A: Հետ եմ գալիս:
A: Սիրում եմ:
B: Սիրում եմ:
B: Մի բան եմ մտածել:
A: Հա:
B: Իսկ եթե տեղափոխվե՞ս:
A: Քեզ մոտ չափից դուրս լուսավոր է:
B: Հա, ճիշտ ես: Մոռացել էի:
A: Շրթունքներդ: Պարանոցդ: Կուրծքդ: Կոնքերդ: Ոտքերիդ մատները:
B: Դու:
A: Իսկ եթե մուգ վարագույրեր բերե՞մ:
B: Տարբերակ է:
A: Գնա՞նք ծով:
B: Գիշերը:
A: Թռչող լապտերներ կբերեմ:
B: Ու երազանք կպահենք:
A: Դու ես իմ երազանքը:
B: Երազում եմ թիթեռնիկ լինել:
B: Գիտե՞ս՝ գլխացավերս ուժգնացել են:
A: Կրկին գնա՞նք հետազոտվելու:
B: Չգիտեմ: Երևի: Վաղը:
A: Քնա՞ծ ես:
A: Չինակա՞ն, թե՞ հնդկական:
B: Երկուսն էլ:
A: Դուռը:
B: Հա:
A: Դուռը:
B: Մոռացել էի:
A: Սիրում եմ:
A: Քնեցի՞ր...
B: Քնել էի: Ի՞նչ օր է:
A: Ուրբաթ:
B: Այդ լավ է: Կգա՞ս վաղը:
A: Վարագույրեր եմ բերելու:
B: Արի թողնենք հետո: Դու միայն արի:
A: Մի բան այն չէ:
B: Հա՞:
A: Կարծես էլ տիեզերք չես:
B: Ափսոս:
A: Սիրում եմ:
B: Սիրում էիր:
A: Կբացե՞ս դուռը:
B: Վերնաշապիկս չեմ գտնում:
A: Իմը հագիր:
B: Լվացել եմ: Գտա:
A: Կամուսնանա՞ս ինձ հետ:
B: Հետո:
B: Երբևէ մտածե՞լ ես, որ հոգեկան հիվանդ եմ:
A: Ամեն օր:
B: Եվ ուզում ես ամուսնանա՞լ:
A: Այո:
B: Չե՞ս վախենում:
A: Ամենասարսափելին արդեն տեսել եմ:
B: Չես տեսել:
A: Կբացե՞ս դուռը:
A: Տանը չե՞ս:
A: Զանգում եմ:
A: Որտե՞ղ ես:
A: Կարոտում եմ:
A: Թիթեռնիկ...
A: Տիեզերք...
A: Ինչպե՞ս կարողացար ախր:
A: Ատում եմ քեզ:
A: Սիրում եմ:
A: Սիրում էի...
Tags:
Պատմվածքներ
2 մեկնաբանություն
Ցավոտ
ReplyDeleteՑավոտ
ReplyDelete